Nanitam kushpipanat nutaui.

Mate, nimushum inniu nutshimit miam utauia kie umushuma.

Mishta-minuatamukupanat etataui utassiuat tanite minuashu meshkanau mak mitshena shakaikana kie kapatakana.

Mitshetinua aueshisha, natamikᵘ eishinakushiniti: musha, atikua, amishkua.

Anutshish eukuan eshkᵘ eshinakuak, uenapissish ute nashipeuat uinipekut, menushkaminiti tshekat napinniti,

e uinnuniti aueshisha ui nipaieuat, « tshimakateu aueshish nutshimit » iteuat.

Nutaui nanatuapatamᵘ ait upakassiun uin, ute etat uinipekut, ui mitshu tshiashku-uaua kie ui mueu tshiashkussa, utshashumekua mak atshikua.

Tshi nipaiati, tshe naikak uikuaiatshikunu mak tshe pitatshet piminu ekᵘ tshe mitshit pimiatshikunu.

Mukᵘ aishkat, apu tshika ut tshissinuapamikut innu utauassima, aianishkat tshe petuteniti.

Pitshenik tshika shetshishuat tshetshi unitaht utinnu-aitunnuau.

– Pitshau anite uetuteiakᵘ, ipan nimushum.

Tanite mitshetuau animiu, mitshetuau peikussu.

– Ka Tipenitak an tshika uitshikunan, ipan nana nukum.

Eukuan itenitakushipan nukum, tshetshishepaushiniti eiamituashut, mishta-minu-tshishikanu mani.

Mamitunenitamᵘ ka aitiht nete ueshkat, pemishkataui ushkuai-utinu,

« Eka nita uni-tshissituta, nitikuti, takuan anite nitipenitamun nutshimit, eka ui metuatshe. »

Ekue itak: « Tshe nakatamuin tshitshissenitamun, nika shaputuepan nin tshitatusseun. » Minutamᵘ nenu etak.